Mvg stendur fyri meirvirðisgjald og er eitt avgjald, sum verður lagt afturat sølu og keyp av vørum og tænastum. Flest virki skulu mvg-skrásetast, um tey taka ímóti gjaldi fyri tær vørur og tænastur, sum tey veita.

Mvg satsur

Í Føroyum skulu virki leggja 25% afturat kostnaðinum av vørum og tænastum sínum. Eitt virki skal boða Taks frá bæði sølu- og keyps-mvg. Tá virki keypir vørur, kann mvg dragast frá (keyps-mvg). Umvent leggur virki mvg afturat prísinum á vørum og tænastum sínum (sølu-mvg).

Sølu-mvg

Sølu-mvg er avgjaldið, sum verður lagt afturat sølu av vørum og tænastum. Selur ein fyritøka eina vøru, sum hevur eitt virði á 100 kr., skulu 25% leggjast afturat prísinum, so kundin skal gjalda í alt 125 kr. við mvg fyri vøruna.

Sølu-mvg skal fyritøkan gjalda til Taks. Hevur fyritøkan selt fyri eina upphædd, sum er størri enn upphæddin, hon hevur keypt fyri, skal fyritøkan rinda munin á sølu- og keyps-mvg’num til Taks.

Er fyritøkan ikki mvg-skrásett, skal hon ikki leggja mvg afturat vørum og tænastum, sum hon selur. Les um mvg-fría sølu her

Keyps-mvg

Keyps-mvg er avgjaldið, sum fyritøkan skal gjalda av vørum, sum hon keypir. Mvg-skrásettar fyritøkur hava frádráttarrætt fyri mvg-útreiðsluna.

Keyps-mvg fær fyritøkan endurgoldið frá Taks. Hevur fyritøkan keypt fyri eina upphædd, sum er størri enn upphæddin, hon hevur selt fyri, kann fyritøkan fáa munin á sølu- og keyps-mvg’num endurgoldnan frá Taks.

Íløgu-mvg

Ger ein mvg-skrásett fyritøka íløgur og keypir t.d. amboð og innbúgv fyri meira enn 20.000 kr. (uttan mvg), hevur fyritøkan frádráttarrætt fyri mvg-útreiðsluna. Hendan mvg-útreiðslan skal tá skrásetast sum “íløgu-mvg”.

Les um íløgur (keyp av rakstrargøgnum og innbúgvi) her

Innlating av mvg-uppgerð

Allarflestu fyritøkur skulu lata eina mvg-uppgerð inn hvønn ársfjórðing. Mvg-uppgerðin verður latin inn talgilt umvegis Vinnugluggan hjá Taks, men kann eisini fyllast út og latast inn fysiskt við brævi.

Soleiðis bókar tú innlating av mvg í Bókini

Við loyvi frá Taks, hevur Bókin sett innlatingar-frymilin fyri mvg-uppgerðina upp í skipanini, soleiðis at hann avspeglar uppsetingina í Vinnuglugganum.

Mvg-uppgerðin í skipanini verður sjálvvirkandi fylt út, tá tú bókar keyp og sølu av vørum og tænastum, so sum tá tú sendir eina rokning og skrásetir gjald umvegis skipanina ella skrásetir eina útreiðslu.

GG! Gev tær far um, hvussu mvg skal skrásetast, tá tú bókar inntøkur og útreiðslur manuelt. Les um manuellar bókingar her

Undantøk

50.000 kr. reglan

Er árligi umsetningurin hjá fyritøkuni minni enn 50.000 kr., skal hon ikki leggja mvg á vøruna, sum hon selur, og hon nýtist heldur ikki at mvg-skráseta seg.

Er fyritøkan mvg-skrásett, men selur eitt árið fyri minni enn 50.000 kr., skal hon alíkavæl taka inn og avrokna mvg.

Mvg § 2-reglan

Taks upplýsir á heimasíðu síni, at sambært § 2 í mvg-lógini skulu niðanfyristandandi øki ikki taka mvg:

• Sjúkrahúsviðgerð, lækna- og tannlæknavirksemi, kiropraktikk, fysioterapi og o.o. læknaliga viðurkend heilsurøkt
• Almannaumsorgan (t.d. barnagarðar, frítíðarheim, umlættingarheim o.tíl., privat sum alment)
• Mentanarvirksemi (tó ikki útvarps- og sjónvarpssendingar, sjónleikasýningar, konsertir o.tíl.)
• Ítróttur og ítróttatiltøk
• Fólkaflutningur
• Postflutningur
• Útleiga av fastari ogn (tó ikki hotellkømur, kampingpláss og lýsingapláss)
• Tryggingarvirksemi
• Bankavirksemi
• Eydnuspæl
• Rithøvundavirksemi, tónaskaldsvirksemi og annað tílíkt listarligt virksemi

Mvg § 12-reglan sigur eisini meira um, hvørji øki ikki skulu taka mvg